Vefnaðarloft

Vefstólarnir eru staðsettir á þriðju hæð Kvennaskólans, þar er ágætis vinnuaðstaða og geymslurými. Útsýnið er stórkostlegt og sést vel hvernig áin Blanda sameinast hafinu við ósinn. 

Fjórar mismunandi stærðir eru á vefstólunum: 80, 120, 130 og 135cm. Þetta eru 4, 6 og 8 skafta og skammela gagnbindingarvefstólar en einnig eru tveir litlir trissuvefstólar. Listamenn sem dvelja í listamiðstöðinni hafa fullan aðgang að vefstólunum og þeim tækjum sem með þeim fylgja. Í vefstofunni er einn lóðréttur myndvefnaðarstóll sem listamenn hafa aðgang að. Vefbreiddin er 85 cm og í vefstólnum eru tvö hafaldasköft, skeið og tvö skammel. Vefstóllinn er Norskur að uppruna og flokkast sem Norrænn myndvefnaðarstóll. Einnig er annar stór myndvefnaðarstóll staðsettur í flosrými. Einnig má finna tvær prjónavélar inn af vefnaðarloftinu. 

Það sem má finna á vefnaðarlofti er: 

• 8x gagnbindingarvefstólar 
• 2x trissuvefstólar
• 1x lóðréttur myndvefnaðarstóll
• 1x lóðréttur myndvefnaðarstóll, stór
• 2x prjónavélar (Passap Duomatic & Brother, inn)
• mikið úrval af skeiðum
• 1x stór rakgrind
• garnvindur
• skyttur
• spólurokkar 

Listamenn eru vinsamlegast beðnir um að hafa meðferðis nauðsynlega hluti eins og málband, skæri, garn og eigin skyttur, ef þeir kjósa. Á staðnum er til lítill lager af ull, bómull og hör sem hægt er að kaupa í Textíllabi.